INTERSECCIÓN – Festival de Arte Audiovisual Contemporáneo, leva implementando accións de sustentabilidade e compromiso social desde os seus comezos no ano 2018.
O pasado ano 2021 decidimos dar un paso máis na dirección de ser un evento máis sostible adheríndonos á iniciativa “Pacto Cultura Sustentable”, unha alianza entre entidades do ámbito da cultura que nos sentimos chamados á acción para a transformación do noso planeta e que ten como obxectivo facilitar e dinamizar a transformación do tecido cultural galego para a súa contribución ao desenvolvemento sostible. Porque a sustentabilidade non é algo illado, ou que teña que transcorrer en paralelo á nosa actividade, a sustentabilidade é parte intrínseca de INTERSECCIÓN.
Como festival, somos conscientes da capacidade que temos para poder exercer de impulsores e catalizadores na implantación de accións que axuden a contribuír aos obxectivos da Axenda 2030, así como de influír en todas aquelas entidades e persoas que de forma directa ou indirecta están vinculadas ao noso proxecto, e para iso contamos cunha política de sustentabilidade que ten por obxectivo o aliñamento de todas as nosas actuacións cun propósito, contribuír aos Obxectivos de Desenvolvemento Sostible (ODS).
De acordo a esta política, a nosa actividade deberá garantir:
- A igualdade e a diversidade (ODS 5)
- Condicións de traballo dignas (ODS 8)
- A adopción de medidas que garantan a accesibilidade (física, motora, cognitiva, sensorial e orgánica) (ODS 10)
- A adopción de medidas de seguridade, saúde, hixiene e benestar (ODS 3)
- Minimizar o consumo enerxético e, sempre que sexa posible, abastecerse de fontes renovables ou menos contaminantes. (ODS 7)
- Minimizar o consumo de auga e garantir o acceso gratuíto á auga potable (ODS 6)
- A promoción do transporte público compartido e fomentar a idea de multimodalidad (ODS 13)
- A implantación de criterios de economía circular: reducir, reutilizar e reciclar, e dispoñer dun sistema adecuado de recollida e xestión dos residuos (ODS 12)
- A medición de indicadores (ODS 8)
- O apoio ao ecosistema artístico local (ODS 11)
- A colaboración con empresas locais (ODS 11)
- A identificación dos grupos de interese (ODS 17)
Ademais, como integrantes do Pacto Cultura Sustentable, subscribimos para o ano 2022, os seguintes obxectivos:
- Identificar as barreiras que impiden a accesibilidade universal aos nosos eventos.
- Eliminar o 100% dos plásticos dun só uso.
- Medir a pegada de CO2 (Alcances 1 e 2)
- Identificar os grupos de interese.
En paralelo ás accións que poñeremos en marcha para alcanzar estes obxectivos, nesta edición continúan vixente accións xa implantadas en edicións anteriores como son: dispoñer de mecanismos que garantan a presenza de mulleres no equipo de produción e na programación, emprego dunha linguaxe non sexista, libre de estereotipos e prexuízos, contar con persoal para asistir a persoas con mobilidade reducida, emprego de vehículos eléctricos, reutilización de elementos en produción, dispoñer dunha oferta gastronómica diversa ou colaborar con entidades de proximidade ou locais.
A totalidade das accións en materia de sustentabilidade recolleranse na Memoria de Sustentabilidade do festival que será publicada unha vez finalizado este.